Verner fon Simens 1816-yilda Prussiyada dunyoga kelgan. 1839 va 1840-yillarda uning ota-onasi ketma-ket hayotdan ko‘z yumgan.
Verner oilada to‘ng‘ich o‘g‘il bo‘lgani uchun 10 nafar uka va singillariga g‘amxo‘rlik qilish uning zimmasiga tushgan. Simens leytenantning maoshi katta oilani ta’minlashga yetmasligini yaxshi tushunib, muhandislik qobiliyati qo‘shimcha daromad olib kelishiga ishongan.
1842-yilda u birinchi ixtirosi – galvanik oltin va kumush bilan qoplash usulini patentlagan. Vernerning ukasi – Vilgelm uni Britaniyada ham patentlagan, keyin esa o‘sha yerda xaridor topib, 1500 funt ishlab olgan. Bu kashfiyot Simensga o‘z moliyaviy ahvolini mustahkamlashga imkon bergan.
1847-yilda Simens va Galske hamkorlikda “Telegraphen-Bauanstalt Siemens & Halske” kompaniyasini tashkil qilishgan. Uning asosiy maqsadi elektrotelegrafiya bo‘lgan. Kompaniyaning xizmat doirasi asta-sekinlik bilan kengayib, boshqa sohalar, jumladan, mexanika va optikani ham qamrab olgan.
