Yoshlarni tadbirkorlikka faol jalb qilish, ularning biznes g‘oyalari va loyihalarini hayotga tadbiq etishlariga ko‘mak berish maqsadida an’anaviy tarzda o‘tkazilib kelinayotgan «Biznes marafon»ning 5-mavsumiga star berildi. Ilk manzil 18-sentabr kuni Xorazm viloyati bo‘ldi.
Yoshlar va tadbirkorlar o‘rtasidagi uchrashuv viloyatning Xiva shahridagi Ichan Qal’a me’moriy yodgorligida bo‘lib o‘tdi.
Dastlab, tajribali tadbirkorlar tomonidan yoshlarga biznes rejalarni tayyorlash hamda tadbirkorlikni boshlash uchun nimalar qilish kerakligi haqida tushunchalar berildi. Biznesni rivojlantirishda qo‘l keladigan dunyodagi ilg‘or tajriba va zamonaviy vositalar bilan tanishtirildi.
Marafon davomida ishtirokchilar oʻzlarini qiynab kelayotgan xatarlarni qanday boshqarish, raqobat muhitida bozorda oʻz oʻrnini topish, xodimlar bilan ishlashdagi usullar, ruhiy va iqtisodiy bankrotlik, biznesdagi barqarorlikka erishish, biznesga investitsiya kiritish, xalqaro hamkorlikni yo‘lga qo‘yish kabi savollarga javoblar olishdi.
