Hukumatning 2026-yil 2-martdagi qarori bilan “Xorijiy oliy ta’lim tashkilotlarida o‘qish istagidagi yoshlar va pedagog xodimlarga ta’lim kreditini ajratish tartibi to‘g‘risida”gi nizom tasdiqlandi. Bu haqda huquqiy axborot kanallarida ma’lum qilindi.
Mazkur nizomga ko‘ra, imtiyozli ta’lim kreditlari Ta’lim kreditini moliyalashtirish jamg‘armasi mablag‘lari hisobidan ajratiladi. Hujjatda kredit ajratish hamda uni qaytarish tartiblari belgilangan.
Qarorga muvofiq, ta’lim krediti QS (Quacquarelli Symonds) yoki THE (The Times Higher Education) reytinglari bo‘yicha top 300 talikka kirgan xorijiy oliy ta’lim tashkilotlariga o‘qishga qabul qilingan yoshlar va pedagog xodimlarga beriladi. Bunda kredit oluvchilar O‘zbekiston fuqarolari bo‘lishi hamda yoshlar 30 yoshdan oshmagan bo‘lishi kerak.
Ta’lim krediti bakalavriat va magistratura dasturlarida o‘qish uchun ajratiladi. Uning miqdori bir o‘quv yili uchun 20 ming AQSH dollarigacha ekvivalentda milliy valyutada belgilanadi.
Hujjatga ko‘ra, kreditning asosiy qarzi talabaning rasmiy o‘qish muddati tugaganidan so‘ng yettinchi oydan boshlab yetti yil davomida qaytariladi. Kredit bo‘yicha foiz stavkasi Markaziy bankning asosiy stavkasi miqdorida belgilanadi.
Ta’lim kreditini olish uchun ariza beruvchi bankka ariza, shaxsni tasdiqlovchi hujjat nusxasi, birinchi kurs uchun taklifnoma-xat, ikkinchi kursdan boshlab akademik o‘zlashtirish natijalari, to‘lov-kontrakt asosida o‘qish bo‘yicha shartnoma hamda oliy ta’lim tashkilotining bank rekvizitlari ko‘rsatilgan invoysni taqdim etishi kerak.
Shuningdek, birgalikda qarz oluvchilarning oxirgi 12 oylik daromadlari haqida ma’lumot va 30 yoshdan oshgan pedagoglar uchun mehnat daftarchasidan ko‘chirma ham talab etiladi.
