Fransiya prezidenti “ikki mamlakat hamkorligini rivojlantirish, xalqlarimiz o‘rtasidagi do‘stlik va o‘zaro anglashuvni mustahkamlashga qo‘shgan ulkan hissasi uchun” Shavkat Mirziyoyevni oliy mukofot — Faxriy legion ordeni bilan taqdirladi.
Fransiyaga tashrif doirasida Parij shahrida O‘zbekiston prezidenti Shavkat Mirziyoyevni Fransiya Respublikasining oliy mukofoti — faxriy legion ordeni bilan taqdirlash marosimi bo‘lib o‘tdi. Bu haqda prezident matbuot xizmati xabar berdi.
Mukofotni davlat rahbariga Fransiya prezidenti Emmanuel Makron tantanali ravishda topshirdi.
“O‘zbekiston prezidenti ikki mamlakat hamkorligini rivojlantirish, xalqlarimiz o‘rtasidagi do‘stlik va o‘zaro anglashuvni mustahkamlashga qo‘shgan ulkan hissasi uchun ushbu ordenga sazovor bo‘ldi”, — deyiladi xabarda.
Mamlakat yetakchisi mukofot uchun Fransiya rahbariga minnatdorlik bildirib, keyingi yillarda sermahsul hamkorlikda yuqori natijalarga erishilgani, ikki mamlakat munosabatlari strategik sheriklik darajasiga ko‘tarilganini qayd etdi.
Faxriy legion ordeni 1802-yilda ta’sis etilgan. Fransiyada ushbu orden alohida xizmatlarning davlat darajasida e’tirof etilishi va shon-sharafning eng yuqori belgisi hisoblanadi.
