Mahsulotlarni faqat mahalliy eksport qiluvchilarga sotuvchi fuqarolar o‘zini o‘zi band qilgan shaxslar sifatida ro‘yxatdan o‘tkazishlari mumkin bo‘ladi.
1-aprel kuni prezidentning qishloq xo‘jaligi va oziq-ovqat mahsulotlarini yetishtiruvchi, ishlab chiqaruvchi hamda eksport qiluvchilarni qo‘llab-quvvatlashga qaratilgan qarori qabul qilindi.
Hujjat bilan, joriy yilda yuqori daromadli va eksportbop mahsulotlarni yetishtirish, saqlash, saralash, quritish, qayta ishlash hamda eksport qilish tadbirlarini amalga oshirishga banklar tomonidan jami 1,5 trln so‘mgacha kredit resurslari yo‘naltiriladi. Mablag‘lar Kichik biznesni uzluksiz qo‘llab-quvvatlash kompleks dasturi doirasida ajratiladi. Mazkur kreditlar qishloq xo‘jaligi mahsulotlarini eksport qiluvchilarga aylanma mablag‘lar uchun revolver tarzda 1,5 mlrd so‘mgacha taqdim etiladi. Ularni 6 oylik imtiyozli davr bilan 3 yilgacha muddatga yillik Markaziy bank asosiy stavkasidan 4%lik punkt yuqori stavkada olish mumkin bo‘ladi.
Mahalliy mahsulotlar stendlarini qishloq xo‘jaligi mahsulotlariga ixtisoslashgan xalqaro ko‘rgazma va yarmarkalarda jozibador lokatsiyalarda joylashtirish uchun ariza kiritish va oldindan 100% to‘lab berish tartibi joriy qilinadi. Bu Savdoga ko‘maklashish jamg‘armasiga ajratilgan mablag‘lar hisobidan amalga oshiriladi.
- “AAA” — 100%;
- “AA” — 95%;
- “A” — 90%;
- “VVV” — 85%;
- “VV” — 75%;
- “V” — 65%.
- Joriy yilning 1-aprelidan meva-sabzavot mahsulotlari bo‘yicha muddati o‘tgan debitor qarzdorlik hisoblanmaydi va tadbirkorga nisbatan jarima qo‘llanmaydi.
Bu bir eksport shartnomasi doirasida kelib tushmagan valyuta summasi eksportga yuklangan jami mahsulot narxining 10%idan oshmasa amal qiladi.
2026-yilgacha mahallalarda qishloq xo‘jaligi mahsulotlarini yig‘ib, faqat mahalliy eksport qiluvchi korxonalarga sotish bilan shug‘ullanuvchi jismoniy shaxslarni o‘zini o‘zi band qilgan shaxslar sifatida ro‘yxatdan o‘tkazishga ruxsat beriladi.
O‘zbekistonning xorijdagi diplomatik vakolatxonalari tegishli davlatda mahalliy qishloq xo‘jaligi mahsulotlarini eksport qilish va realizatsiya qilishda savdo agentlari faoliyatini yo‘lga qo‘yadi.
Eksportbop mahsulotlar yetishtiruvchilariga 100 mln so‘mgacha garovsiz kreditlar beriladi. Eksportga mo‘ljallangan qishloq xo‘jaligi mahsulotlarini yetishtirishga 15 ming gektar yerni auksionga qo‘yish rejalashtirilgan.
Mart oyida Shavkat Mirziyoyev raisligida o‘tkazilgan videoselektor yig‘ilishida barqarorlik reytingida yuqori ko‘rsatkichlarga ega tadbirkorlarga xorijiy ko‘rgazmalarda ishtirok etish xarajatlarini qoplab berish masalasi ilgari surilgandi.
