Jahondagi rekord narxlar fonida Markaziy bank 12 tonnadan ortiq qimmatbaho metal sotdi.
Martda O‘zbekistonning oltin-valyuta zaxiralari ikki oylik pasayishdan keyin ko‘tarildi. Bu haqda Markaziy bank ma’lumotlarida keltirilgan.
Joriy yilning 1-mart holatiga ko‘ra, mamlakat oltin-valyuta zaxiralari hajmi $34,19 mlrdni tashkil etdi. O‘tgan oyda xalqaro aktivlar hajmi $1,99 mlrdga oshib, joriy yilning dastlabki ikki oyidagi pasayishni deyarli qopladi.
Xorijiy valyutadagi aktivlar miqdori $8,26 mlrdni tashkil etib, so‘nggi yillardagi eng past ko‘rsatkichlardan birida saqlanib qoldi. O‘tgan oyda ularning miqdori $710,7 mlnga oshdi. Ko‘rsatkich ketma-ket 11 oy davomida $10 mlrddan past darajada qolmoqda.
Bundan tashqari, boshqa xorijiy moliya institutlaridagi hisobvaraqlaridagi mablag‘lar miqdori $760,6 mlnga oshganiga qaramay, $8 mlrddan pastda qolmoqda. Mamlakat oltin zaxiralari sezilarli darajada oshib, aprel oyi boshida $25,37 mlrdni tashkil etdi. Fevralga nisbatan uning qiymati jahondagi rekord darajadagi narxlar sabab $1,27 mlrdga oshdi.
Shuningdek, zaxiradagi oltinning fizik hajmi sezilarli darajada — bir oy oldingi 11,9 mln troy unsiyadan (370 tonna) 11,5 mln troy unsiya (357,69 tonna) kamaydi.
O‘zbekiston fevral oyida oltin sotish bo‘yicha dunyoda yetakchi bo‘ldi. Mamlakat bu oyda xorijga eng ko‘p — 12 tonna oltin sotgan.
Fevral oyida oltin yetkazib berish eksportning yarmini ta’minladi. Oltin savdosi o‘tgan yilgi $1,18 mlrddan $1,31 mlrdni tashkil etdi.
