O‘zbekistonlik o‘quvchilar 2026-yilda xalqaro fan olimpiadalarida 220 ta medal qo‘lga kiritdi

2026-yil boshidan buyon o‘zbekistonlik o‘quvchilari xalqaro fan olimpiadalarida jami 220 ta medalni qo‘lga kiritdi. Shundan 35 tasi oltin, 81 tasi kumush va 104 tasi bronza medali bo‘ldi.

O‘quvchilar joriy yilda ilk bor Xalqaro sun’iy intellekt olimpiadasida ham ishtirok etib, 1 ta kumush va 2 ta bronza medalini qo‘lga kiritgan.

Toshkent viloyatida o‘tkazilgan Al-Xorazmiy nomidagi Xalqaro matematika va informatika olimpiadasida esa O‘zbekiston vakillari 61 ta medalni qo‘lga kiritgan. Ularning 11 tasi oltin, 22 tasi kumush va 28 tasi bronza medalidan iborat.

Abu Ali ibn Sino nomidagi xalqaro biologiya olimpiadasida O‘zbekiston o‘quvchilari 11 ta medal — 2 ta oltin, 3 ta kumush va 6 ta bronza medalini qo‘lga kiritib, yakka peshqadam sifatida e’tirof etilgan.

Eng nufuzli xalqaro fan olimpiadalarida O‘zbekiston o‘quvchilari jami 16 ta medal — 1 ta oltin, 7 ta kumush va 8 ta bronzaga ega bo‘lgan.

Xususan, 96 davlat ishtirokida O‘zbekistonda o‘tkazilgan Xalqaro kimyo olimpiadasida 1 ta oltin va 3 ta kumush medal qo‘lga kiritilgan.

Xitoyda 119 davlat vakillari qatnashgan Xalqaro matematika olimpiadasida O‘zbekiston o‘quvchilari 2 ta kumush va 3 ta bronza medaliga sazovor bo‘lgan.

Kolumbiyada 96 davlat ishtirokida o‘tkazilgan Xalqaro fizika olimpiadasida 2 ta kumush va 2 ta bronza medal qo‘lga kiritilgan. Litvada 80 dan ortiq mamlakat vakillari qatnashgan 37-Xalqaro biologiya olimpiadasida esa O‘zbekiston jamoasi 3 ta bronza medalini olgan.

Bundan tashqari, o‘quvchilar til va iqtisod yo‘nalishidagi xalqaro olimpiadalarda ham sovrinli o‘rinlarni egallagan.

Jumladan, Germaniyada 51 davlat ishtirokida o‘tkazilgan Xalqaro nemis tili olimpiadasida O‘zbekiston vakili 1 ta oltin va 1 ta bronza medalini qo‘lga kiritgan.

Xitoyda 60 davlat ishtirokida tashkil etilgan Xalqaro iqtisod olimpiadasida esa o‘zbekistonlik o‘quvchilar 2 ta bronza medaliga sazovor bo‘lgan.