Korrupsiyaga qarshi kurashish agentligida Ochiqlikni taʼminlash sohasida amalga oshirilayotgan ishlarning samaradorligi va natijadorligini baholash komissiyasining yig‘ilishi bo‘lib o‘tdi. Bu haqda agentlik matbuot xizmati xabar berdi.
Unda 2022-yil yakunlariga ko‘ra, davlat organlari va tashkilotlarida ochiqlik bo‘yicha amalga oshirilgan ishlarning samaradorligi va natijadorligini baholashga qaratilgan Ochiqlik indeksi asosida to‘plangan barcha ko‘rsatkichlar atroflicha muhokama qilinib, yakuniy natijalar eʼlon qilingan.
Ochiqlik indeksi 84 ta baholash mezonidan tarkib topgan 8 ta indikator asosida baholangan. Samaradorlik ko‘rsatkichlari 71 balldan 100 ballgacha to‘plaganlar — “yashil”, 55 balldan 71 ballgacha bo‘lganlar — “sariq” va 55 balldan past ko‘rsatkich qayd etganlar — “qizil” toifalarga kiritilgan.
Baholashda umumiy 86 ta vazirlik, idora va muassasalar qamrab olingan bo‘lib, ulardan 21 tasi vazirlik, 14 tasi mahalliy davlat hokimiyati organlari, 32 tasi davlat ishtirokidagi tashkilotlar hamda 19 tasi qo‘mita va agentliklar.
Ochiqlik indeksining yuqori pog‘onalarini prezident huzuridagi Statistika agentligi (88,8 ball), Iqtisodiyot va moliya vazirligi huzuridagi Bojxona qo‘mitasi (88,3), Toshkent viloyati hokimligi (83,3) egallagan.
Oxirgi o‘rinlarni esa “Yo‘lqurilish” AJ (21 ball), O‘zbekiston Milliy teleradiokompaniyasi (21 ball), “Qishloqqurilishinvest” (21,7 ball) band etgan.
