Shu bilan birga, biznesning narxlar o‘sishi bo‘yicha median prognozi avgust oyidagi pasayishdan so‘ng yana ko‘tarildi.
O‘zbekistonliklarning inflyatsion kutilmalari sentyabr oyida yillik minimumni qayd etdi. Bu haqda Markaziy bank hisobotida maʼlum qilindi.
Kelgusi 12 oy uchun narxlar o‘sishining o‘rtacha prognozi 2024-yil iyulidan beri birinchi marta aynan 12% ni tashkil etdi. Median ko‘rsatkich ham 0,2% punktga pasayib, 10,3% ga tushdi.
Hududlar bo‘yicha eng yuqori kutilmalar Sirdaryo (12,7%) va Toshkent viloyatlarida (12,6%) qayd etildi, keyingi o‘rinlarda Qashqadaryo (12,5%) va poytaxt (12,4%) joylashdi. Inflyatsiya bo‘yicha eng ko‘p optimizm Buxoro (10,5%), Surxondaryo (11,2%) va Xorazm (11,4%) viloyatlarida kuzatildi.
Kasblar kesimida kutilayotgan inflyatsiya darajasi pensionerlar (13,5%), sanoat ishchilari va quruvchilarda (13,3%) eng yuqori bo‘ldi. Eng past prognozlar qishloq xo‘jaligida (10,3%), talabalarda (11%) va umumiy ovqatlanish sohasida (11,1%) kuzatildi.
Daromad toifalari orasida oyiga 20−30 mln so‘m daromadga ega guruh prognozlari eng yuqori (17,8%) bo‘ldi. 10−20 mln yoki 30 mln so‘mdan yuqori daromadli guruhlarda kutilmalar taxminan 14% ni tashkil etdi, eng past ko‘rsatkich esa 2 mln so‘mgacha daromadli guruhda (11%) qayd etildi.
Inflyatsion kutilmalarga taʼsir ko‘rsatuvchi asosiy omil uy-joy kommunal xizmat ko‘rsatish tariflarining oshishi bo‘lib qolmoqda — respondentlarning 46% i buni taʼkidlagan. Ikkinchi o‘rinda yoqilg‘i va energiya narxlarining o‘sishi (41%), keyingi o‘rinlarda ish haqi va nafaqalarning oshishi (27%), transport xarajatlari va oziq-ovqat narxlarining o‘sishi (25% dan) joylashgan.
Toshkent shahrida biznesning inflyatsiya bo‘yicha kutilmalari eng yuqori bo‘ldi — 13,4%, keyingi o‘rinlarda Samarqand (13,3%) va Xorazm (13,1%) joylashdi. Eng past ko‘rsatkichlar Qoraqalpog‘istonda (10,3%), Qashqadaryoda (10,4%) va Navoiyda (10,8%) qayd etildi.
IT va turizm sohasidagi tadbirkorlar tarmoqlar bo‘yicha eng yuqori prognozlarni berdilar — 13,3%, logistika sohasi 12,9% bilan keyingi o‘rinda turadi. Boshqa tomondan, savdo va sanoatda (10,8%), shuningdek, qishloq xo‘jaligi sohasida (11,1%) baholash o‘rtacha ko‘rsatkichdan ancha past bo‘ldi.
Aholi singari, biznes prognozlariga ham birinchi navbatda kommunal xizmatlar (ishtirokchilarning 44% i) va energiya narxlarining o‘sishi (41%) taʼsir ko‘rsatmoqda. Boshqa variantlardan ko‘pincha transport xarajatlarining oshishi (30%) va ish haqining ko‘tarilishi (29%) qayd etilgan bo‘lsa, valyuta tebranishlari atigi 22% ni tashkil etdi.
