Avvalroq ushbu transport vositalarini boshqarish uchun tegishli toifadagi haydovchilik guvohnomasiga ega bo‘lish talabi 1-mart etib belgilangandi.
Hukumatning 12-apreldagi qarori bilan moped va skuterlarni boshqarish uchun haydovchilik guvohnomasiga ega bo‘lish talabi o‘zgartirildi.
Hujjat bilan, o‘tgan yilning iyul oyida Vazirlar Mahkamasi qarori bilan tasdiqlangan foydalanishdagi moped va skuterlarni davlat ro‘yxatidan o‘tkazish tartibi to‘g‘risidagi vaqtinchalik nizomga o‘zgartirishlar kiritildi.
Unga ko‘ra, ushbu transport vositalarini boshqarish uchun tegishli toifadagi haydovchilik guvohnomasiga ega bo‘lish talabi 1-oktabrdan kuchga kiradi. Avval bu muddat joriy yilning 1-marti etib belgilangandi.
Shu bilan birga, mazkur vaqtinchalik nizom 2025-yilning 30-sentabrigacha amal qiladi.
Ushbu hujjat dvigatel hajmi 25 dan 50 kub santimetrgacha bo‘lgan yoki elektr motorining quvvati 0,25 dan 4 kVt gacha va maksimal tezligi 25 dan 50 km/soatgacha bo‘lgan mopedlar va skuterlarni majburiy davlat ro‘yxatidan o‘tkazishni nazarda tutadi.
Ularni davlat ro‘yxatidan o‘tkazish IIV YHXX hududiy boshqarmalarining ro‘yxatdan o‘tkazish va imtihon olish bo‘linmalari tomonidan amalga oshiriladi.
Moped yoki skuterni ro‘yxatidan o‘tkazish uchun uning egasi yoki vakili quyidagi hujjatlarni taqdim etishi kerak:
- shaxsini tasdiqlovchi hujjat va ishonchnoma;
- belgilangan namunadagi arizasi;
- texnik tavsiflar aks ettirilgan savdo tashkilotlari (agar mavjud bo‘lsa);
- unga bo‘lgan mulkiy va boshqa ashyoviy huquqlarni tasdiqlovchi hujjat yoki xarid qilinganligini tasdiqlovchi hujjat (agar mavjud bo‘lsa);
- moped yoki skuterni davlat ro‘yxatidan o‘tkazish hamda ularga davlat raqami belgilarini va guvohnomalarni berish uchun to‘lovlar to‘langanligini tasdiqlovchi kvitansiya (elektron to‘lov tizimlar orqali to‘lov amalga oshirilgan hollar bundan mustasno).
Mopedlar va skuterlarni ro‘yxatdan o‘tkazish xarajatlari quyidagicha:
- ariza berish va hujjatlarni topshirish — 37 500 so‘m;
- davlat raqami — 562 500 so‘m;
- texnik pasport — 262 500 so‘m;
- ro‘yxatdan o‘tish — 562 500 so‘m.
Vazirlar Mahkamasi 2024-yilning iyul oyida moped va skuterlar uchun davlat raqamlari turlarini tasdiqladi. IIV va Texnik tartibga solish agentligi uch oy ichida ular uchun texnik reglamentlarni belgilashi va 2025-yildan ro‘yxatdan o‘tmagan mopedlarni boshqarishni taqiqlanishi kerak edi.
Dekabr oyida Ichki ishlar vaziri Po‘lat Bobojonovning tegishli buyrug‘i bilan moped va skuterlarga davlat raqami belgilarini berish uchun yig‘im miqdori BHMning 1,5 baravari — 562,5 ming so‘m etib belgilandi.
Shuningdek, yil yakuniga kelib, IIV Yo‘l harakati xavfsizligi xizmati skuter, elektroskuter va elektromototsikllar uchun ro‘yxatdan o‘tkazish raqami belgilarini berishni boshladi.
