Talabgor daraxt ekib parvarishlaganidan so‘ng, platformaga kiritilgan ma‘lumot tasdiqlansa, subsidiya to‘lab beriladi.
Kambag‘al oilalarga o‘rmon fondi yerlarida ekilgan daraxtlar uchun subsidiya ajratiladi. Bu haqdagi tegishli nizom hukumat qarori bilan tasdiqlandi.
Hujjatga ko‘ra, kambag‘al oila aʼzolariga o‘rmon fondi yerlarida ekilgan va parvarishlangan har 100 ta daraxt uchun BHMning 1 baravari (412 ming so‘m) miqdorida subsidiya ajratiladi.
Talabgor o‘rmon xo‘jaligi tayinlagan masʼul xodim ko‘rsatmalari asosida tanlangan maydonda yerni tayyorlaydi. U shu maydonda daraxt ko‘chatlarini bir mavsum davomida ekib, parvarishlaydi.
Murabbiy tuman ekologiya bo‘limi bilan birgalikda talabgor tomonidan ekilgan daraxt ko‘chatlarini joyiga chiqqan holda dalolatnoma va fotohisobot asosida qabul qilib oladi.
Tuman ekologiya bo‘limi tomonidan “Ekofaol fuqaro” platformasida har bir talabgor uchun shaxsiy kabinet ochilib, unga ekilgan daraxt ko‘chatlari to‘g‘risidagi maʼlumotlar kiritib boriladi.
Kiritilgan maʼlumotlar tuman ekologiya bo‘limi tomonidan 5 ish kuni ichida tasdiqlanadi yoki tasdiqlanishi rad etiladi.
Talabnoma Qoraqalpog‘iston Ekologiya va iqlim o‘zgarishi qo‘mitasiga, viloyatlar hamda Toshkent shahar Ekologiya va iqlim o‘zgarishi bosh boshqarmalariga yuboriladi.
Ekologiya boshqarmalari subsidiya mablag‘larini 5 ish kuni mobaynida talabgorning bank kartasiga o‘tkazib beradi.
