Bu haqda AOKAda o‘tkazilgan brifingda Oila va xotin-qizlar qo‘mitasi axborot xizmati rahbari Saodat Boymirzayeva ma’lum qildi.
Qayd etilishicha, shu yil 2 million nafar xotin-qiz bandligini ta’minlash, 250 ming nafar xotin-qizni kasb-hunar va tadbirkorlikka o‘qitish, 250 ming nafar xotin-qizni oliy ta’lim bilan qamrab olish hamda 50 ming nafar ehtiyojmand xotin-qizni sanatoriylarda sog‘lomlashtirish hamda ularda tadbirkorlik ko‘nikmalarini shakllantirish bo‘yicha motivatsion seminarlar tashkil etish kabi 4 ta eng muhim maqsadli ko‘rsatkichga erishish rejalashtirilgan.
2025 yilda 250 ming nafar xotin-qizni oliy ta’lim bilan qamrab olish bo‘yicha Oliy ta’lim, fan va innovatsiyalar vazirligi bilan birgalikda prognoz ko‘rsatkichlar ishlab chiqildi. Maqsadli ko‘rsatkichning bajarilishi yuzasidan xotin-qizlarni oliy ta’limga qamrab olish bo‘yicha «yo‘l xaritasi» tasdiqlanib, ijroga yo‘naltirilgan.
O‘quvchilarni kasb-hunarga yo‘naltirish va psixologik-pedagogik respublika tashxis markazi, respublikaning barcha umumiy o‘rta ta’lim maktablari direktorlari va mahalla xotin-qizlar faollari tomonidan joriy yil aprel oyida 221 ming 17 nafar 11-sinf bitiruvchi qiz o‘rtasida OTMlarga jalb etish bo‘yicha so‘rovnoma o‘tkazildi.
Ulardan 196 ming 811 nafari oliy ta’lim tizimida, 11 ming 31 nafari texnikumlarda o‘qish istagini, 5 ming 999 nafari kasbga tayyorlash markazlarida o‘qib, tadbirkorlik bilan shug‘ullanmoqchiligini va 7 ming 176 nafari ishlamoqchiligini ma’lum qildi.
So‘rovnomaga ko‘ra, qizlarning 102 ming 36 nafari qo‘shimcha fan to‘garaklariga, 19 ming 949 nafari oilasidagi ijtimoiy masalalarni hal etishga ehtiyoji borligini ma’lum qilgan. 33 ming 526 nafari boshqa turli masalalar yuzasidan ko‘makka muhtojligi, 77 ming 227 nafari oliy ta’lim muassasasiga kirishda ko‘makka muhtoj emasligini bildirgan.
