Prezident tomonidan «Jahon banki ishtirokidagi «O‘zbekiston binolari uchun toza energiya» loyihasini amalga oshirish chora-tadbirlari to‘g‘risida»gi qaror imzolandi.
Hujjat bilan Jahon banki ishtirokidagi «O‘zbekiston binolari uchun toza energiya» loyihasining asosiy texnik-iqtisodiy parametrlari tasdiqlanmoqda.
Ularda quyidagilar nazarda tutilgan: qurilish mollarini (issiqlik izolyatsiya materiallari, quvurlar, eshik va oyna romlari, qurilish materiallari) va uskunalarni (qayta tiklanuvchi energiya manbalari qurilmalari, isitish tizimi, isitish qozonlari va h.k.) sotib olish; qurilish-montaj ishlari; energiya audit xizmatlari.
«O‘zbekiston binolari uchun toza energiya» loyihasini amalga oshirish uchun Jahon bankining kengashi tomonidan O‘zbekistonga 30 yil muddatga, shu jumladan 5 yillik imtiyozli davr bilan 143 mln AQSh dollari miqdorda qarz mablag‘larini ajratish ma’qullangan. Loyiha doirasida maktabgacha, maktab va sog‘liqni saqlash sohalarida 800 dan ziyod muassasalarni modernizatsiya etish rejalashtirilgan.
Loyihani amalga oshirish bo‘yicha «Yo‘l xaritasi» tasdiqlangan bo‘lib, unga ko‘ra 2023 yil may oyiga qadar loyiha doirasida rekonstruksiya (modernizatsiya) qilinishi ko‘zda tutilgan obektlar ro‘yxatini shakllantirish belgilangan.
