Nyu-York, xuddi bir yil avvalgidek, eng ko‘p millionerlar yashaydigan dunyo shaharlari reytingida birinchi o‘rinni egalladi. Bu haqda “Daryo”ga Henley & Partners va New World Wealth tomonidan e’lon qilingan hisobotdan ma’lum bo‘ldi.
Hisobotga ko‘ra, Xitoy va Amerika shaharlari reytingning eng yuqori pog‘onasidan joy olgan, birinchi o‘ntalikka kiruvchi yagona Yevropa shahri — London.
Xususan, ayni paytda yetakchi Nyu-York shahrida (AQSH) 340 ming millioner istiqomat qiladi.
10 yil avval ro‘yxatda birinchi o‘rinni egallagan Tokio (Yaponiya) 290,3 ming millioner bilan ikkinchi, 285 ming millioner bilan San-Fransisko (AQSH) uchinchi o‘rinda.
To‘rtinchi o‘rinni 258 ming badavlat aholisi bilan London (Buyuk Britaniya), beshinchi o‘rinni esa 240,1 ming millioner bilan Singapur egalladi.
O‘tgan yilga nisbatan kuchli beshlik yetakchilari o‘zgarmagan bo‘lsa-da, ikkinchi beshlikda ma’lum rotatsiyalar sodir bo‘ldi.
Shunday qilib, Los-Anjeles (AQSH) oltinchi o‘rinni saqlab qoldi (205,4 ming millioner), lekin Chikago va Xyuston (ikkalasi ham AQSHda) kuchli o‘nlikdan tushib ketdi.
Ammo Gonkong yettinchi o‘rinni egallab, kuchli o‘nlikka qaytdi (129,5 ming millioner). Sakkizinchi va to‘qqizinchi o‘rinlarda o‘tgan yilgidek Xitoyning Pekin (128,2 ming boy) va Shanxay (127,2 ming millioner) shaharlari joylashgan.
Kuchli o‘nlikni Sidney (Avstraliya) yakunlab turibdi, u kuchli o‘nlikka yangi kirgan (126,9 ming millioner).
Sidney 2040-yilga borib dunyoning eng boy besh shaharlaridan biri bo‘lishi prognoz qilinmoqda.
