2026-yil yanvar-iyun oylarida 21 042 nafar chet el fuqarolari oʻqish maqsadida Oʻzbekistonga keldi. Bu haqda Statistika qoʻmitasi maʼlumot berdi.
Tahlil qilinishicha, yarim yil ichida xorijlik talabalar soni 2025-yil mos davriga nisbatan 11,5 ming nafarga (2,2 barobarga) koʻpaygan.
Soʻngi olti oyda Oʻzbekistonga oʻqish maqsadida eng koʻp kelganlar Turkmaniston fuqarolari boʻlgan — 9 207 nafar. Bunda Hindiston (3 723 nafar), Tojikiston (1 915 nafar) va Xitoy (951 nafar) fuqarolari ulushi ham yuqori shakllangan.
Qirgʻizistondan 834 nafar, Pokistondan 689 nafar, Misrdan 603 nafar, Koreyadan 526 nafar yoshlar taʼlim olish uchun Oʻzbekistonni tanlagan. Shuningdek, 367 nafar Filippin, 302 nafar AQSH fuqarolari oʻqish maqsadida respublikaga kelgan. Boshqa davlatlardan mamlakatga tahsil boʻyicha tashrif buyurganlar soni 1 925 nafarni tashkil etgan.
