5-avgust kuni Toshkent vaqti bilan soat 07:00 dan 09:00 gacha Xitoyning Haiyang Sharqiy kosmodromidan Star.Vision kompaniyasi tomonidan “O‘zbekkosmos” agentligi bilan hamkorlikda ishlab chiqilgan Samarkand — 2028 Yerni masofadan zondlash sun’iy yo‘ldoshi orbitaga muvaffaqiyatli chiqarildi. Bu haqda agentlik matbuot xizmati xabar berdi.
Qayd etilishicha, Samarkand — 2028 sun’iy yo‘ldoshining uchirilishi O‘zbekiston tarixidagi eng yirik xalqaro kosmik loyiha bo‘lib, mamlakat milliy kosmik dasturi rivojida yangi bosqichni boshlab berdi. Mazkur loyiha, shuningdek, O‘zbekiston va Xitoy o‘rtasidagi strategik ilmiy-texnologik hamkorlikning yangi sahifasini ochmoqda.
Missiyaning eng muhim jihatlaridan biri shundan iboratki, Star.Vision kompaniyasining xalqaro loyihalari tarixida ilk bor “O‘zbekkosmos” agentligi muhandislari tomonidan ishlab chiqilgan sun’iy intellekt moduli sun’iy yo‘ldosh tarkibiga integratsiya qilindi. Mazkur texnologiya sun’iy yo‘ldosh tomonidan olingan ma’lumotlarni bevosita orbitaning o‘zida qayta ishlash imkonini beradi. Natijada uzatiladigan ma’lumotlar hajmi sezilarli darajada qisqaradi, natijalarni olish tezlashadi hamda keyingi tahlil jarayonining samaradorligi yanada oshadi.
Samarkand —2028 missiyasi qishloq xo‘jaligi, ekologiya, tabiiy resurslarni monitoring qilish, suv resurslarini boshqarish, favqulodda vaziyatlarning oldini olish, shaharsozlik hamda iqtisodiyotning boshqa strategik yo‘nalishlarida kosmik texnologiyalarni qo‘llash uchun yangi imkoniyatlarni yaratadi.
Shu bilan birga, loyiha kosmik muhandislik, sun’iy intellekt va sun’iy yo‘ldosh ma’lumotlarini qayta ishlash sohalarida mamlakatning milliy salohiyatini yanada rivojlantirishga xizmat qiladi.
