Oʻzbekistondagi banklar 2025-yilda aholi va biznesga 390 trillion soʻm kredit ajratdi. Foizli qarz ajratish koʻrsatkichi 2024-yildagiga (287,2 trillion soʻm) nisbatan qariyb 36 foizga oshgan.
Markaziy bank tahliliga koʻra, oʻtgan yili mamlakatda kreditlash faolligi barqaror oʻsgan.
Yil davomida milliy valyutada ajratilgan kreditlar 276,4 trillion soʻmga yetgan (2024-yilda — 193,3 trillion soʻm). Shundan 156,8 trillion soʻmi jismoniy shaxslarga, 108,8 trillion soʻmi korxonalarga berilgan. Soʻmdagi foizli qarzlar umumiy portfel oʻsishining asosiy manbasi boʻlgan.
“2025-yilda yakka tartibdagi tadbirkorlarga — 10,8 trillion soʻm miqdorida kreditlar ajratildi”, deyiladi Markaziy bank tahlilida.
Oʻtgan yilda chet el valyutasida berilgan kreditlar soʻm ekvivalentida 113,6 trillion soʻmni tashkil etgan (2024-yilda — 94 trillion soʻm). Xorijiy kreditlarning asosiy ulushi, yaʼni 113,1 trillion soʻmi korxonalar hissasiga toʻgʻri kelgan. Qolgan 441,5 mlrd soʻmni yakka tartibdagi tadbirkorlar olgan.
“2024–2025-yillarda ajratilgan kreditlar tarkibida milliy valyutada moliyalashtirish ulushi oshgan, yuridik shaxslarning chet el valyutasidagi kreditlarga talabi saqlanib qolgan”, deya qayd etgan regulyator.
