Mablag‘lar Tiklanish va taraqqiyot jamg‘armasi tomonidan beriladi. Ularning yarmi davlat organlarida SI texnologiyalarini joriy etishga, qolgan yarmi esa venchur jamg‘armalar orqali innovatsion loyihalarni qo‘llab-quvvatlashga yo‘naltiriladi.
Prezident sunʼiy intellekt texnologiyalariga asoslangan loyihalarni qo‘llab-quvvatlash bo‘yicha qarorni imzoladi. Bu haqda Adliya vazirligining Huquqiy axborot kanali xabar berdi.
Qaror bilan, ijtimoiy soha va iqtisodiyot tarmoqlarida sunʼiy intellektga asoslangan startap loyihalarni moliyalashtirish kengaytiriladi.
Loyihalarni moliyalashtirish uchun Tiklanish va taraqqiyot jamg‘armasidan 2026−2027-yillarda qo‘shimcha $100 mln miqdorida mablag‘ ajratiladi
Uning doirasida $50 mln beg‘araz asosda davlat organlari va tashkilotlari faoliyatiga sunʼiy intellekt texnologiyalarini joriy etish uchun ishlatiladi.
Yana $50 mln teng ulushlarda Fondlar fondi va IT Park Ventures venchur jamg‘armalari ustav kapitaliga sunʼiy intellektga asoslangan loyihalarni qo‘llab-quvvatlash uchun ajratiladi.
Bunda mablag‘lar Tiklanish va taraqqiyot jamg‘armasining ulushi sifatida kiritiladi. Ushbu mablag‘lar Raqamli O‘zbekiston — 2030 strategiyasini amalga oshirish bo‘yicha muvofiqlashtirish komissiyasi tomonidan taqsimlanadi.
21-oktabr kuni prezident raisligida sun’iy intellekt texnologiyalarini rivojlantirish yuzasidan videoselektor yig‘ilishda SI infratuzilmasiga $100 mlndan ko‘p sarmoya kiritgan investorlarga elektr energiyasi narxi 5 sent etib belgilanishi aytilgandi.
Shuningdek, 2026-yilda O‘zbekistonda super-kompyuter xaridi uchun $100 mln ajratilishi taʼkidlangan.
