AQShning sobiq prezidenti Donald Tramp oʻzining shaxsiy ijtimoiy tarmogʻi ortidan 430 million AQSh dollari miqdorida daromad koʻrib ulgurdi. Uning umumiy boyligi miqdori 3 milliard AQSh dollariga yetgan. Bu haqida “Forbes” nashri xabar berdi.
Maʼlumotlarga koʻra, sobiq prezidentning daromadi bir yil ichida 25 foizga oshgan va yillik daromad koʻrsatkichi 600 million AQSh dollarini tashkil qilgan. U dunyodagi eng badavlat odamlar reytingidagi 1083-oʻrindan joy olgan.
Tahlilchilar bunday oʻsish koʻrsatkichlariga Tramp tomonidan yaratilgan “TRUTH Social” ijtimoiy tarmogʻi bevosita taʼsir koʻrsatganini aytib oʻtganlar.
Eslatib oʻtamiz, Tramp dunyoning turli mamlakatlarida joylashgan koʻplab kompaniyalarning aktivlariga, shuningdek bir nechta golf maydonlariga egalik qiladi. U Twitter tomonidan akkaunti butunlay bloklab qoʻyilganidan keyin oʻzining shaxsiy ijtimoiy tarmogʻini yaratish fikriga kelgan. Bunga 2021-yilning yanvar oyida Tramp tarafdorlarining Kapitoliyga hujum qilganlari sabab boʻlgan. Aynan mana shu vaqtda Facebook, YouTube, TikTok kabi boshqa ijtimoiy tarmoqlar ham uning akkauntlarini vaqtinchalik bloklashgan. Tramp esa buni odamlarni soʻz erkinligidan mahrum qilishga urinish deya baholagandi.
