Davlatimiz rahbari Shavkat Mirziyoyevning tashabbusi bilan kichik biznes va xususiy tadbirkorlik, fermerlik hamda hunarmandchilik borasida qabul qilinayotgan qarorlar kichik va oʻrta sinf vakillarini har tomonlama qoʻllab-quvvatlash, ularni moddiy hamda maʼnaviy jihatdan ragʻbatlantirish, ilgʻor tajribalarni ommalashtirish, yoshlarda esa tadbirkorlikka ishtiyoq uygʻotishga xizmat qilayotgani bilan ahamiyatlidir. Bu boradagi ishlar samarasini yanada oshirish maqsadida “Yoshlar — kelajagimiz” jamgʻarmasining tuzilgani esa yoshlarga oid masalalarning hamisha davlat eʼtiborida ekanligini namoyish etadi. Qayd etish joizki, jamgʻarma faoliyati yoshlarning biznes tashabbuslari, startaplari, gʻoyalari va loyihalarini roʻyobga chiqarishga koʻmaklashish va qoʻllab-quvvatlash, band boʻlmagan yoshlarni mehnat bozorida talab yuqori boʻlgan mutaxassisliklar va biznes yuritish koʻnikmalariga oʻqitish, shuningdek, umuman yoshlarning ijtimoiy-iqtisodiy faolligini oshirish orqali ularning bandligini taʼminlashga qaratilgan.
Shu munosabat bilan “Yoshlar – kelajagimiz” jamgʻarmasi, Yoshlar ishlari agentligi hamda “MFaktor” hamkorligida barcha hududlar qamrab olinadigan “BIZNES MARAFON”ning beshinchi mavsumiga start berilgan. Zero, koʻplab yoshlarning talab va istaklari asosida tashkil etilayotgan marafon kelajagani oʻz qoʻli bilan yaratish istagida boʻlgan yoshlar uchun ayni muddaodir. Binobarin, respublikamizda faoliyat koʻrsatayotgan eng ilgʻor tadbirkorlarlar ishtirokidagi ushbu marafon oʻzaro tajriba almashish, biznes va tadbirkorlik faoliyatiga zamonaviy texnologiyalar, innovatsion ishlanmalarni jalb etish, jahon bozoriga chiqish uchun yoʻllanma vazifasini oʻtaydi. Yurtimiz va xorijda muvaffaqiyatga erishgan tajribali tadbirkorlar va yoshlar ishtirokida ochiq muloqot shaklida oʻtkazib kelinayotgan marafonning o‘tgan toʻrt mavsumida (2021-2023-yillar) 110 ming nafardan ziyod yoshlar bevosita ishtirok etgan boʻlsa, 9 million nafarga yaqin yoshlar “onlayn” tarzda kuzatib bordi. Loyiha davomida faol ishtirok etgan yoshlarga biznes va shaxsiy rivojlanishga oid “Bestseller”, xususan, 3 ming dona bosma kitoblar tarqatildi, 24 ming nafar yoshlarga esa mobil ilova orqali elektron va audio shaklda kitoblar taqdim etildi.
2024-yilda Surxondaryo viloyatida 5-mavsumi start olgan va yurtimizning barcha hududlarida tashkil etilgan loyihaning final qismi 12-dekabr kuni soat 14:00da Jizzax shahridagi Kiber sport arenasida bo‘lib o‘tdi. Marafon bu safar o‘zgacha — shou-dastur ko‘rinishida tashkil etildi. Marafonga kelgan yoshlar uchun B2B uchrashuvlari tashkil qilindi. Biznes rejalarni tayyorlash hamda tadbirkorlikni boshlash uchun nimalar qilish kerakligi haqida tushunchalar berildi. Shuningdek, ishtirokchilar biznesni rivojlantirishda qoʻl keladigan dunyodagi ilgʻor tajriba va zamonaviy vositalar bilan tanishtirildi.
Barcha suratlarni quyidagi havola orqali ko’rishingiz mumkin:
https://teletype.in/@yoshlar_kelajagimiz/0mwu1z_BQmm
