Britaniya Kengashi tomonidan O‘zbekiston Respublikasi Oliy va o‘rta maxsus ta’lim vazirligi va “Change School” bilan hamkorlikda mamlakatimizdagi oliy o‘quv yurtlari uchun tashkil etilgan “Tadbirkorlik universiteti mukofoti” natijalari sarhisob qilindi.

Tanlovda uchun Britaniya Kengashining “Creative Spark” dasturi ishtirokchilari bo‘lgan 11 ta yetakchi universitet sakkizta nominatsiya bo‘yicha g‘oliblik uchun bahslashdi. G‘oliblarni tanlash Buyuk Britaniyaning yetakchi tadqiqot markazlarining ijodiy-iqtisodiyot mutaxassislari tomonidan amalga oshirildi.

– Ushbu tashabbus jamoalarning birgalikdagi ishlarini namoyish etish va mehnatning samarasi uchun ajoyib imkoniyat. Ushbu tadbirda universitetlarning ishtirok etishi juda muhim, chunki u ijodiy fikrlash, kooperatsiya va tarmoqni rivojlantirishga yordam beradi. Qolaversa, iqtisodiy rivojlanish, ish bilan ta’minlash va yangi korxonalar yaratilishini qo‘llab-quvvatlaydi, – deydi O‘zbekistondagi Britaniya Kengashi direktorining o‘rinbosari Jamila G‘ulomova.

Toshkent davlat texnika universiteti “Yilning tadbirkor universiteti” mukofoti g‘olibi bo‘ldi. Universitet talabalarning g‘oyadan tijoratgacha bo‘lgan loyihalarini qo‘llab-quvvatlash uchun “Yil mukofoti”, “Muqobil energiya manbalari” o‘quv dasturini joriy qilganligi uchun “Yashil universitet” kabi uchta nominatsiya bo‘yicha g‘oliblikni qo‘lga kiritdi.

Shuningdek, Toshkent to‘qimachilik va yengil sanoat instituti “To‘qimachilik”, Kamoliddin Behzod nomidagi Milliy rassomlik va dizayn instituti “Ta’sir”, Toshkent davlat iqtisodiyot universiteti hamda O‘zbekiston davlat san’at va madaniyat instituti “O‘quv dasturida tadbirkorlik” nominatsiyalari bo‘yicha g‘olib, deb topildi.

Ma’lumot o‘rnida aytish joiz, “Creative Spark” – bu Britaniya Kengashi dasturi bo‘lib, u yoshlar o‘rtasida ijodiy tadbirkorlik ta’limi, ishbilarmonlik tafakkuri va ishbilarmonlik ko‘nikmalarini rivojlantirish uchun oliy ta’lim sohasida ikki tomonlama hamkorlikni mustahkamlashga qaratilgan. Dastur MDHning yettita mamlakatida ishlaydi va Buyuk Britaniya mintaqada ijodiy iqtisodiyotni rivojlantirishga hissa qo‘shadi. Dasturda 110 ta universitet ishtirok etadi. So‘nggi uch yilda hududda tadbirkorlikni rivojlantirish dasturi doirasida 750 mingdan ziyod yoshlar malaka oshirdi, 65 o‘quv kursi va 15 biznes-inkubator ochildi.

Registon maydonida tashkil etilgan mahorat darslarida tadbirkorlik sohasida yuksak muvaffaqiyatlarga erishgan yurtimiz va xorijda samarali faoliyat olib borayotgan 12 nafar tadbirkor “Muvaffaqiyatga erishish sirlari” mavzusida yoshlar bilan muloqot qildi. “Biznes marafon” ishtirokchilari mahoratli tadbirkorlardan biznes yuritish borasida o‘zlarini qiziqtirgan savollariga javob olish imkoniga ega bo‘ldi.

– “Biznes marafon” motivatsion treningni o‘tkazishdan maqsad sohaga kirib kelayotgan yoki bo‘lmasam tadbirkor bo‘lishga qiziqayotgan, lekin nimadan boshlashni bilmay turgan yoshlar o‘ziga xos yo‘l-yo‘riq ko‘rsatib, ularga dalda berish va ruhlantirishdan iborat, – deydi “Yoshlar – kelajagimiz” jamg‘armasi ijrochi direktori Xayrulla Sattarov. – Ta’kidlash joizki, viloyatlar kesimida o‘tkazilayotgan biznes darslarimizga qiziquvchilar soni sekin asta ortib bormoqda. Samarqandda eng ko‘p ishtirokchi – 3500 nafar yosh tadbirkor bilan oflayn tarzda muloqot qildi. Eng muhimi, biz muloqotni onlayn tarzda ham yo‘lga qo‘yganmiz. “Biznes marafon”da qatnashish imkoniga ega bo‘lmagan yoshlarimiz ijtimoiy tarmoqlar orqali ham o‘zlarini qiziqtirgan savollariga mahoratli tadbirkorlarimizga yo‘llab javob olish imkoniga ega bo‘ldi.

“Biznes marafon” motivatsion trening darslarida ishtirok etgan spikerlar o‘zlarining biznesdagi ilk qadamlari haqida ham ma’lumot berib, yoshlarni o‘zlari qiziqqan sohada qo‘rqmasdan faoliyat boshlashi lozimligini alohida ta’kidlashdi.

Yurtimiz va xorijda mahorat bilan biznes yuritayotgan tadbirkorlarimizning saboqlari samarqandlik yoshlarni tadbirkorlik sohasidagi rejalarini hayotdagi asosiy maqsadga aylantirdi. “Biznes marafon”da qatnashgan ko‘plab yoshlar shu yerning o‘zida kelgusi maqsadlarini aniq qilib oldi.

“Biznes marafon” yoshlarning savollar marafoniga aylanib ketdi. Spikerlar yoshlar tomonidan har bir savolga batafsil javob qaytarib, ularga zarur tavsiyalarni berdi.